Aðgerðaráætlun gegn einelti, áreitni og ofbeldi

Hlusta

Við hjá Ási styrktarfélagi lýsum því yfir að hvorki einelti, áreitni eða ofbeldi, af hvaða toga sem er verður liðið hjá félaginu.

Hjá Ási styrktarfélagi er lögð áhersla á að fólk sýni hvort öðru gagnkvæma virðingu og að fólk vinni saman að því að skapa öruggt starfsumhverfi og jákvæðan starfsanda.

Almennt

Öllum hlutaðeigandi aðilum sem starfa eða nýta þjónustu Áss styrktarfélags skal tryggt öruggt umhverfi og virðing. Í því felst að þurfa ekki að þola einelti, áreitni eða annars konar ofbeldi í störfum sínum eða í tengslum við starfsemina líkt og segir til um í jafnréttisáætlun. Stjórn Áss styrktarfélags og framkvæmdastjóri bera ábyrgð á aðgerðaráætlun og úrræðum fyrir hlutaðeigandi aðila.

Starfsfólk Áss styrktarfélags getur leitað til næsta yfirmanns, forstöðumanns mannauðsmála eða öryggistrúnaðarmanns ef hvers kyns mál er varða einelti, áreitni eða annars konar ofbeldi koma upp. Tilkynnt er um slík mál á sérstöku eyðublaði sem er að finna á Workvivo og einnig á heimasíðu félagsins. Tilkynningarnar berast EKKO teymi sem sér um úrvinnslu mála.

Hægt er að leita ráðgjafar hjá stéttarfélagi en stéttarfélag aðhefst ekki í einstökum málum.

Notendur þjónustu Áss styrktarfélags geta leitað til forstöðumanns, ráðgjafa eða réttindagæslumanns ef hvers kyns mál er varða einelti, áreitni eða annars konar ofbeldi koma upp. Notendur þjónustu geta fengið aðstoð starfsmanns við skráningu í gegnum heimasíðu Áss styrktarfélags.

Tilkynnendur geta óskað eftir nafnleynd við meðferð máls.

Skilgreiningar á einelti, kynferðislegri áreitni, kynbundinni áreitni og ofbeldi

Reglugerð 1009/2015 um aðgerðir gegn einelti, kynferðislegri áreitni, kynbundinni áreitni og ofbeldi á vinnustöðum

Einelti er síendurtekin hegðun sem almennt er til þess fallin að valda vanlíðan hjá þeim sem fyrir henni verður, svo sem að gera lítið úr, móðga, særa eða ógna viðkomandi eða að valda honum ótta. Skoðanaágreiningur eða ágreiningur vegna ólíkra hagsmuna fellur ekki hér undir. Dæmi um birtingamyndir eineltis geta verið:

Baktal, slúður, særandi orð, hörð gagnrýni, einangrun, útilokun, misræmi í úthlutun verkefna, leyna upplýsingum, skemmdarverk, geðheilsa dregin í efa, rafrænt.

Kynferðisleg áreitni er hvers kyns kynferðisleg hegðun sem hefur þann tilgang eða þau áhrif að misbjóða virðingu viðkomandi, einkum þegar hegðunin leiðir til ógnandi, fjandsamlegra, niðurlægjandi, auðmýkjandi eða móðgandi aðstæðna. Hegðunin getur verið orðbundin, táknræn og/eða líkamleg.

Dæmi um orðbundna hegðun: Tvíræðar athugasemdir eða brandarar með kynferðislegum undirtón.

Dæmi um táknræna hegðun: Óvelkomin skilaboð og myndefni með kynferðislegum undirtón.

Dæmi um líkamlega hegðun: Óviðeigandi og óvelkomin líkamleg snerting.

Alvarleg tilvik áreitni geta fallið undir hegningarlög, jafnvel þótt um eitt tilvik sé að ræða.

Kynbundin áreitni er hegðun sem tengist kyni þess sem fyrir henni verður og hefur þann tilgang eða þau áhrif að misbjóða virðingu viðkomandi og skapa aðstæður sem eru ógnandi, fjandsamlegar, niðurlægjandi, auðmýkjandi eða móðgandi fyrir viðkomandi.

Dæmi um kynbundna áreitni:

Óviðeigandi talsmáti eða framkoma sem tengist kyni og kynhneigð fólks
Niðurlægjandi eða lítillækkandi athugasemdir um kyn einstaklings og getu hans/hennar/þess.
Almennt neikvætt viðhorf um ákveðið kyn á vinnustaðnum
Fordómar gagnvart fólki af ákveðnu kyni

Ofbeldi er hvers kyns hegðun sem leiðir til, eða gæti leitt til, líkamlegs eða sálræns skaða eða þjáningar þess sem fyrir henni verður, einnig hótun um slíkt, þvingun eða handahófskennda sviptingu frelsis.

Dæmi um ofbeldi:

Þegar einhver meiðir, til dæmis sparkar, lemur, hrindir eða klípur.
Hótun um að meiða.
Þegar tæki eða tækni er notað til að fylgjast með starfsfólki, ógna því, áreita eða niðurlægja.
Einangra einhvern frá samstarfsfólki, fylgjast með eða stjórna samskiptum við aðra.
Hunsun, að uppnefna fólk og/eða öskra á það.

Úrvinnsla mála

EKKO teymi og forstöðumaður mannauðsmála sjá um úrvinnslu mála.

EKKO teymi aflar upplýsinga hjá tilkynnanda. Veitir stuðning með trúnaðarsamtali eða ráðgjöf. Aðrir aðilar eru ekki upplýstir um málið nema með samþykki tilkynnanda. Teymið, í samvinnu við tilkynnanda, tekur ákvörðun um framhald eða lokun máls.
Þegar niðurstaða liggur fyrir er forstöðumaður mannauðsmála upplýstur um hana.
Ef niðurstaða EKKO teymis er að um framhald máls sé að ræða gerir forstöðumaður mannauðsmála meintum geranda/gerendum grein fyrir því að tilkynning um einelti, kynferðislega áreitni, kynferðislegt ofbeldi eða ofbeldi hafi borist og upplýsir hlutaðeigandi aðila. Mögulega afla upplýsinga hjá öðrum hlutaðeigandi aðilum ef þörf krefur.
Ef málsaðilar sættast á að fara í ráðgjöf má kalla þá saman með fagaðila, og ákvarða í sameiningu hvernig samskiptum verður háttað í framhaldinu.
Þegar EKKO teymi hefur komist að niðurstöðu mun það upplýsa hlutaðeigandi aðila og skila niðurstöðum til forstöðumanns mannauðsmála.
Forstöðumaður mannauðsmála ber ábyrgð á því að brugðist sé við á viðeigandi hátt.

Bent er á eftirfarandi efni:

Innri gögn

Ytri gögn